فحصو ليها الايدز لقوه قاااااعد
الغريبة انو الزول قدر مايقول مايكتب يلقة نفسو قدام العارض دا وبكتب .المهم صحت بدري ومشت الحمام وجات قعدت قدام المرايا قريب الساعتين شي احمر وشي بنفسجي وشي بلبسو وشي بعضو وشي بختو وشي بقلعوا المهم بعد الساعتين ديل مرقت كان شفتها وهي قايمة من النوم مابتعرفة بعد الساعتين ديل نهائيا ولو جرينا الشريط بتذكر افلام توم اند جيري ويكون في شكلة وغبار كتير كدة, بعد شوية يجبوهم ليك مربطين بي شاش ولصق كدة وحاجات وشينين كدة . بس مع فردتنا دي الشنة دي كانت قبل الشكلة القدام المرايا المهم مرقت برة ولاقاها اسماعيل بتاع الرقشة وضحك وفصيل كدا, خليه ساي . وغشاها بيت حاجة صفية السافرت الحج وأدتو . المفتاح اخدو قعدتهم وبعداك واصلو طريق وفي الطريق قالت ليه : ((والله الليلة حق المواصلات ماعندي)) . طلع الخمسة الاف الصبنة من توريدت امبارح قطعة فيها وقال كلمتو المعهودة:(( انا بقصر كمان ؟)) . نسيت اقول ليكم قبل مايطلعو من ناس حاجة صفية وقفت في المراية ساعتيين وبعداك طلعوا . ونزلت منه في الزلط وإذا بي عبد العزيز بتاع الامجاد يأشر ليها ويناديها وبكل إبتسامه عريضة موجودة في الكون تركب معاهو ويتونسو ويشيلو فطورهم ويمشوا بيت حسين العزابي وهم مارقين نفس الوقفة في المرايا الساعتين ويطلعو وتنزل منو في الخرطوم وتغشي عصام مدير شركة جعجعة التجارية وعصام يتكبكب ويجيب في البارد والعصير والغدة والساعة خمسة جات والرواد بتاعين الشركة كراع قطعت من الشركة وزي الساعة سبعة وهي عصام مارقين وقفت في المرايا ساعتين وأوصلك البيت طبعا مفهماه انها ساكنة حي المطار وما تنزلني جمب الباب ونزلني في الشارع وهو ماش عاين بي مرايتو لقاها وقفت ليها بتاع كريلا نار عديل كدا عصام دا أصلو غنا جديد مابيعرف بنات الاصول فقال في سرو والله البت دي أهله مرطبين
وفلانة في الونسة والضحك مع بتاع الكريلا وبي خمسين وبتاع الكريلا بي عشرة بس في النهااااااااية كدة بي خمسطاشر المهم تسعة ألا ربع بقت مارقة وصلت البيت وهي بتحسب في الخمسين الجابته معاها الليلة وهي بتسب في الرجال والبخل الضاربن الايامات دي ما أصلو في غلاء اسعار
الصباح عيت عية شديد وجع بطن وحمي وأعراض ملاريا شديدة مشت الدكتور وفحصو ومافي اي حاجة ولسة عيانة فحصو ليها الايدز لقوه قاااااااااااااااعد
أمها ضربت ، السكلي أخوها المشه معاها المستشفي برك في الواطة ، ابوها لمة عرف قال إلا يكتلة ، أخته الأصغر منها خااافت خوف شديد ، لكن كل واحد منهم بالدس كدا مشا فحص في مراكز الفحص المجاني المنتشرة في مستشفيات الخرطوم ومالقة عندو حاجة يعني الايدز ده مابجيك كان ماعملته العمايل دي
المهم ابوها خوفا من الفضيحة كدا قال يعمل رايح ويقول البت كانت عندها ملاريا تعبت تعب شديييييد وكدا بقة موضوع الملاريا دا متفق عليه والبت مرت من المرحلة بتاعت العيا الشديد دي وخشت مرحلت الزول تشوفو نصييح لكن الايدز قااااااعد وبقه ناس البيت جبتي من وين يابتي كلمينا يابتي وهي ساكتة ساااي ما قالت اي حاجة المهم الاحساس بتاع انا حاموت داك جاها وبقت يائسة يأس شديد ولمت ليك فيها أمها شي جمعيةالمسجد وشئ نمشي لي شيخ فلان ولي شيخة فلانة المهم , وتدين شديد كدا زمان ما كان في وإذا بها واحدي من نسوان الحلة تعجبة البت الفي جامع طوالي دي وتكلم ولدة عشان يخطبة والبت جاها عريس.
البت في فهما إنو الرجال هم السبب في الحصل ليها دا وانها ماعملت اي حاجة عشان كدا وافقت طوالي لمن لاقاها في الجزارة الصباح وهي ماشة تشتري لحمت الغداء وقالت ماعندها مشكلة رغم مشكلة الايدز العيانة بيه المهم الكلام لمن وصل امها قالت مامشكلة بس نشاور ابوها أبوها قال ماممكن طبعا ، وأخوها قال ماممكن وأختة قالت ماممكن وأمها إقتنعت في النهاية والبت خشت مرحلت النفسيات
مرحلت النفسيات دي بدت لمن ناس الحلة بقوا يطلعوا في الكلام زي البت دي عندها أيدز وماله ماعرست وبقت تصلي طوالي كدي
ماله والتعامل بينه وبين ناس الحلة بقة محدود خصوصا مع هناية جارتهم لمن لقت ولدة الحلاتو داك ماشي في الشارع وقالت كدا (( حلاتو ولدك ياهناية)) ودايرة تبوسو هناية زي الاسد إنتفضت فيها وقالت ليها ((زحي كدا بلا دايرة تبوسيه)) رغم انو هناية عملت الكلام دا لاشعوريا مع بتنا دي لكن حست بانها شبه غلطانة لكن قالت في نفسة ماعندها إيدز يعني تبوس ولدي دا وتعاديهو رغم انو علميا مابتعاديهو الإيدز مابتنقل الاعن طريق سوائل الدم ماعن طريق اللعاب المهم حالت النفسيات زادت شديد ودخلت طور انو التعامل معاها بقة مختلف خصوصا لمن إسماعيل بتاع الركشة القبيل داك مات وعرفو إنو كان عندو إيدز وهي كانت في الحلة طالعة ونازلة معاهو والخبر بقة مؤكد في الحلة والناس تعاملة إتغير شديد بعد داك يعني كان جات الجزارة تشتري حاجة النسوان ديل بفضو ليك الجزارة دي ذي الضربن بمبان رغم أنو الايدز مابتنقل الا عن طريق حاجات معروفة يعني إتصال جنسي وما أظن تاني بعد دة في زول في الحلة بفكر فيها كدا ولا نقل دم وناس حلتة ديل في نظرة دمهم تقيل وما محتاجين ليهم لي دم منها
ولا استعمال المشارط والمثاقب والحقن الممكن تخترق الجلد والحاجات دي ماعند زول في الجزارة لانها مامستشفي يعني كان وقفن جمبها للصباح الحبة مابجيهن لكن بس قاصديين يجيبو ليها النفسيات زي ما قالت وبدت تحس انها ما السبب في الحصل دا ولازم تعاقب الناس الكانو السبب ومرت ايام وشهور وهي تعبانة صاح العلاج مجاني في مركزالايدز لكن شغل مافي والمناعة حقتة رغم الادوية ماشة ناقصة وتامر ود المهندسين البتعالج معاها عاجبة لكن تامر عامل فيها ماعندو وعربيتو كل مايجي المركز يشيل الدوا بتكون فيها بت شكل وعامل فيها بعاقب البنات الكانو السبب لكن قصتو حا نسمعة لي قدام
بتنا النفسيات تعبتة شديد والناس معاملينها كعب شديد وتفرقة لايمكن تتصورة في العرس لمن تمشي ماف واحدي من صحباتة بتقيف معاها وناس بيتم بقو خبرة في مرض الايدز وطرق انتقالو والطرق المابنتقلبيها لدرجة كل واحد منهم بقة يعرف شعار يوم الايدز العالمي السنة دي كان شنو المهم وزي كل سودانيين محترمين نفسهم ماإتكلمو ولاورو أي زول بالعلم العندهم دا علي الاقل يحمو بيه نفسهم لانو ناس الحلة بدو هم زاتهم يتهموهم وبقت عيلة مهمشة وقربو يرفعو السلاح في وش الحكومة اقصد ناس الحلة والموضوع إطور وبقة من الجهل لي درجة جيراهم البالحيطة رحلوا وأجروا بيتهم لي ناس ولمن الناس عرفو دفعوا قروش بسيطة في أيجار البيت لكن تعالو نعرف السكن منو في البيت ودفع القروش البسيطة دي
كانت زمان بتحب تلبس وتجدع خصوصا انو جسمها كان النوع الفاير داك وكلو بروز زي مافهمتو وكانت متعتة في الدنيا دي تشوف نظرة الشهوة في عيون كل البنظرو ليها من الرجال وإهتمامة الكتير بي انها ترفع من الصدرية لي فوق كل ما النظرات حولها إلتهبت بي مشاعر ذئبية والنيران في الاجساد الرجالية الحولها ولعت والحسد والغيرة والإشمئزاز في البنات والرجال المحترمين المحترمين زادت وبقو ينظرو ليها نظرت وين ناس النظام العام وبعد الجاها دا بقت ما مجقجقة زي زمان وإتماصت من لحم الدنيا والهدوم الاشترة بي قروش الحرام دخل فيها مقص الحلال وصغرة عشان تبقة قدرة الناس حولها نصحوها كتير لكن ماسمعت كلام في لبسها زمان وأسع بعد ما إنجبرت بقت تلبس الطويل والمحجب سواء كانت مجبورة أو بعد حالت التدين الجاتة بعد احساس الموت راجيك العندها غالبا البنات بحب يعملو كدا لأنهم بشوفو في الاولاد نظرة أعجاب في لبسهم ارجو منكم تناقشو معاي النقطة دي المهم السكن في بيت الجيران الرحلو ديل عصام .
عصام بتاع شركة جعجعة التجارية وهو بالمناسبة ماعندو أيدز ليه لانو لمن كان بيعمل معها الحاجات دي كان بيستخدم الواقي بين غوسين كدا الكندم لكن ماتفرحو يالناس القايلنو بيحمي مابيحمي الابي نسبة معينة يني لوكنته مجروح في خشمك وهي مجروحة في خمشة دقستة ….عصام سكن وطبعا ماعرفة اول يوم لمن كان طالع بالعربية لأنها بقت ضعييييفة ولابسة محتشم شديد لكن هي عرفتو . وعصام من النوع المتزوجين جداد ديلاك المابعاين الا في مرتو يعني أتزوج عشان يلتزم وبما أنو كان من الجماعة بتاعنها إياهم قررت ماتحتكة بيه وتبعد نهائيا من أي إحتكاك أو معرفة حتي مرتو ماتتعرف بيها لانها قرت تتوب وتنسي الحاجات دي نهائيا .
ومرت عصام ، وعصام , طبعا عارفين انو بيت جيرانهم دا موبؤ بالايدز ذي ما ناس الحلة فهموهم إذن (س) تساوي (ص) مافي علاقات علاقات تك تاك لحدي ماجة يوم عصام طالع بالعربية ومستعجل وماشاف البت الجات قاطعة خشم الباب في اللحظة الهو طالع فيها وطااااااااخ حادث وزي ماعزيزي القارئ إتوقع طقة بتنا زاااااااتة
عصام ادة العربية خلف ورفع كراع من الكلتش والتانية في البنزين وبتكلم مع مرتو الفتحت باب القراش وماسكة الباب وبتتكلم عن انه الخدار الفي التلاجة كمل واللحمة مافي وعصام بقول ليها ماف مشكلة بعدين بجيبو معاي بس ختي طرحتك دي كويس ورجع سريع بالعربية وطااخ راح خابت البت بتنا زاتة .
بتنا في البداية كانت طالعة من البيت ماشة تشتري زيت ملاح من دكان الفوراوي القدام الفي ناصية الشارع وأصلها عاطلة الايامات دي والعيا متعبة شديد وبقت مرسال البيت وهي ماشة حست بي حاجة ضربتة في جمبتة اليمين دي ولزتة رمتة بعيد . إحساسة بالحولها بده يختفي وشريط حياته من ماولدها لحدي الان جه ماري قدامة وكدي ندخل في خيالة ونعرف هي منو.
مني محمد خاطر مواليد 1985عمرة اربعطاشر سنة في اللحظة دي من الشريط (( شريط حياتة المرة قدامة))
ابوها إشترة ليهم دش والبنات المابخجلو البرقصو قدامه مع الاولاد في قناة إم بي سي
وهي بتحضر في التلفزيون وجسمها كلو حاساهو مولع عايزة ترقص زيهم……………….. إسماعيل البوديها المدرسة بالرقشة بتاعتو بتكلم معاها وهي ممتحنة الشهادة……………
بديها ورقة صغيرة بوريها فيها كيف عيونة حلوات والبرتكان في صدرك جنني الكلام الخلاها تفرح وتبتسم وتزأطط من جوة …………
إسماعيل بتاع الرقشة ماشي مع ريهام صحبتة يوم في الشارع غارت شديد لمن بكت رضاهابعد ماقابلة تاني بي حضنة جميلة ومعاها بوسة إتمنت أنو الحكاية تستمر لكن ما كان في طريقة ………………….
إسماعيل ساقة بيت ناس إخلاص وحضرت معاهو فلم وبيت ناس إخلاص فاضي نور الدين أخوها يتضارب مع إسماعيل بعد يومين ويشاكل ويمنعة تقابل إسماعيل تاني
أبوها ينزل المعاش تمشي الجامعة
نرمين لبسة إشترتة من الامارات
………………………….
حسام الفي حفلة ناس زهرة قال كلام عجبة عن الفستان اللابساهو في الحفلة بعد الحفلة إنتهت قعدو دايرة وإتونسو ساقة بعيد ومسك يدها وإتونسو لي إتنين صباحا وهو بكلمة عن كيف انها هي حلوة …………..
إسماعيل يلاقيها يد
المزيد
ـــــــــــــــــــــــــــــــــــــــــــــــــــــــــ
التصنيفات : غير مصنف |
